Cwestiwn 1415VB Cynulliad Cenedlaethol Cymru

Yr Arolygwyr sy’n penderfynu ar y rhan fwyaf o apeliadau, ond bydd Cynulliad Cenedlaethol Cymru yn penderfynu ar ganran fechan ohonynt, fel arfer oherwydd bod y datblygiad yn fawr neu’n ddadleuol. Nodir y polisi ar gyfer “adfer” apeliadau i’w penderfynu gan Gynulliad Cenedlaethol Cymru yn yr ymateb i Gwestiwn 1415VB Cynulliad Cymru, a atebwyd ar 12 Hydref 1999.

Glyn Davies: Gofyn i Ysgrifennydd y Cynulliad dros Lywodraeth Leol a’r Amgylchedd. Beth yw polisi’r Cynulliad Cenedlaethol tuag at alw ceisiadau cynllunio i mewn? (WAQ1415VB).

Peter Law: Ein polisi yw peidio ag ymyrryd ag awdurdodaeth awdurdodau cynllunio lleol oni fydd yn angenrheidiol gwneud hynny. Awdurdodau Cynllunio Lleol sydd â chyfrifoldeb dros reoli cynllunio o ddydd i ddydd yn eu hardaloedd a dylent fod yn rhydd i gyflawni’r dyletswyddau hynny mewn modd cyfrifol.

O bryd i’w gilydd, bydd yn briodol i’r Cynulliad wneud penderfyniad yn hytrach na’r awdurdod cynllunio lleol. Defnyddir pwerau’r Cynulliad i alw ceisiadau cynllunio i mewn er mwyn iddo benderfynu arnynt, yn ddewisol. Ystyrir ceisiadau ar sail bob achos yn unigol ac yn gyffredinol, dim ond lle mae cais yn codi materion cynllunio sy’n bwysig i fwy na dim ond yr ardal leol y caiff ceisiadau eu galw i mewn i’w hystyried, a fyddai’n cynnwys materion:

• sy’n gwrthdaro â pholisïau cenedlaethol;
• y gallent gael effeithiau helaeth y tu hwnt i’w hardal leol;
• y gallent ennyn dadlau sylweddol y tu hwnt i’r ardal leol;
• sy’n debygol o effeithio’n sylweddol ar safleoedd sydd o ddiddordeb gwyddonol, cadwraeth natur neu hanesyddol;
• sy’n codi materion diogelwch cenedlaethol; neu
• sy’n codi materion cynllunio newydd.

Arolygwyr Cynllunio sy’n penderfynu ar y rhan fwyaf o apeliadau cynllunio o dan bwerau a drosglwyddir yn statudol iddynt. Mae gan y Cynulliad bwerau i adfer apeliadau cynllunio gan yr Arolygiaeth a gwneud penderfyniad arnynt ei hun. Ein polisi yw defnyddio’r pwerau hynny lle bo’n briodol gwneud hynny yn unig. Mae adfer apeliadau yn seiliedig ar y meini prawf canlynol:

• datblygiad preswyl o fwy na 150 o dai neu ar fwy na 6 hectar o dir;
• datblygiadau manwerthu dros 9,000 metr sgwâr;
• ceisiadau mawr i gloddio a gweithio mwynau;
• cynigion ar gyfer datblygiadau mawr y gallent gael effeithiau helaeth y tu hwnt i’w hardal leol;
• cynigion sy’n ennyn dadlau sylweddol y tu hwnt i’w hardal leol;
• cynigion sy’n codi materion cynllunio newydd;
• cynigion sy’n ennyn trafferthion cyfreithiol sylweddol;
• cynigion y mae un o Adrannau’r Llywodraeth wedi’u gwrthwynebu; neu
• achosion y gellir ond gwneud penderfyniad arnynt ar y cyd ag achos nad oes gan Arolygydd awdurdodaeth drosto.