Canllaw i gymryd rhan mewn apeliadau hysbysebion

Atodiad 3

Côd Ymddygiad Arolygwyr

Er bod yr egwyddorion hyn wedi’u hanelu yn bennaf at Arolygwyr Cynllunio,
maent hefyd yn berthnasol i bawb sy’n gwneud penderfyniadau yn yr
Arolygiaeth Gynllunio.

Mae’r cod hwn yn seiliedig ar Saith Egwyddor Bywyd Cyhoeddus a nodwyd
gan yr Arglwydd Nolan fel cadeirydd y pwyllgor ar safonau mewn bywyd
cyhoeddus (sef anhunanoldeb, uniondeb, gwrthrychedd, atebolrwydd, bod yn
agored, gonestrwydd a rhoi arweiniad) yn ogystal ag “egwyddorion Franks”,
sef bod yn agored, yn deg ac yn ddiduedd. Mae’r egwyddorion a nodir isod yn
ychwanegol at y dyletswyddau a’r cyfrifoldebau a osodir ar Arolygwyr o dan
God y Gwasanaeth Sifil.

• Mae Arolygwyr yn gwneud eu penderfyniadau a’u hargymhellion er
  budd y cyhoedd.
• Nid yw Arolygwyr yn barnu achos cyn i’r dystiolaeth gael ei hystyried.
• Nid yw Arolygwyr yn ymwneud ag achosion lle mae ganddynt fuddiant
  ariannol neu bersonol a allai greu’r argraff eu bod yn bleidiol.
• Ni fydd ystyriaethau amherthnasol na dylanwadau o’r tu allan yn
  dylanwadu ar Arolygwyr pan fyddant yn gwneud eu penderfyniadau a’u
  hargymhellion.
• Mae Arolygwyr yn gwrthod pob rhodd, lletygarwch a buddiannau eraill a
  gynigir iddynt gan bobl â buddiant mewn achos, ar wahân i’r rhai sydd o
  fawr ddim gwerth.
• Mae Arolygwyr yn ymdrin ag achosion mor gyflym â phosibl.
• Mae Arolygwyr yn trin pob person sy’n ymddangos ger eu bron gydag
  urddas a pharch.
• Nid yw Arolygwyr yn gwahaniaethu yn erbyn pobl ar sail hil, rhyw,
  cyfeiriadedd rhywiol, statws priodasol, crefydd, anabledd, oedran, ac ati.
• Mae Arolygwyr yn osgoi oedi diangen wrth ddod i’w penderfyniadau a’u
  hargymhellion.
• Mae Arolygwyr yn rhoi rhesymau dros eu penderfyniadau a’u
  hargymhellion.
• Mae Arolygwyr yn sicrhau bod ganddynt y wybodaeth broffesiynol a’r
  sgiliau diweddaraf.
• Mae Arolygwyr yn gyfrifol am eu penderfyniadau a’u hargymhellion.

Cyfeiriadau a rhifau ffôn