Caniatadau Gollwng a Chaniatadau Eraill – canllaw i’r weithdrefn apelio

Atodiad 1 - Deddf Adnoddau Dwr 1991 Caniatâd Gollwng

Rhan 1 – Cefndir Deddfwriaethol

1.1 Gan ddefnyddio pwerau o dan Ddeddf Adnoddau Dwr 1991 (fel y’i diwygiwyd), gwnaed Rheoliadau newydd ar 26 Tachwedd 1996 yn cwmpasu caniatâd gollwng, apeliadau a chofrestri cyhoeddus. Daeth y Rheoliadau hyn, Rheoliadau Rheoli Llygredd (Ceisiadau, Apeliadau a Chofrestri) 1996, i rym ar 31 Rhagfyr 1996. Wrth ddod i rym, diddymodd y Rheoliadau y Rheoliadau canlynol :-

Rheoliadau Rheoli Llygredd (Caniatâd ar gyfer Gollyngiadau ac ati) (Swyddogaethau’r Ysgrifennydd Gwladol) 1989;
Rheoliadau Rheoli Llygredd (Gollyngiadau gan yr Awdurdod Afonydd Cenedlaethol) 1989;
Rheoliadau Rheoli Llygredd (Cofrestri) 1989.

1.2 Mae’r prif resymau a gwmpesir yn y Rheoliadau fel a ganlyn:-

• y gweithdrefnau i’w dilyn mewn cysylltiad â cheisiadau am ganiatâd gollwng, neu eu hamrywio, yn cynnwys ceisiadau a wneir gan Asiantaeth yr Amgylchedd. Yn ogystal, maent yn nodi’r weithdrefn i’w dilyn pan roddir caniatâd gollwng o dan baragraff 6 Atodlen 10 Deddf Adnoddau Dwr 1991, heb wneud cais;
• y gweithdrefnau i’w dilyn mewn cysylltiad ag apeliadau i Gynulliad Cenedlaethol Cymru o dan Adran 91 a 191B Deddf Adnoddau Dwr 1991 – apeliadau yn erbyn caniatâd gollwng ac apeliadau mewn cysylltiad â gwybodaeth i’w chofnodi ar gofrestri rheoli llygredd y mae Asiantaeth yr Amgylchedd wedi penderfynu nad yw’n fasnachol gyfrinachol;
• y manylion sydd i’w cofnodi ar gofrestri rheoli llygredd dwr a gynhelir gan Asiantaeth yr Amgylchedd. Maent yn nodi pryd y dylid cofnodi, ac yn ymdrin â mynegeio’r cofrestri.

Rhan 2 – Materion y gellir eu cwmpasu gan apêl

2.1 Pan fydd apêl yn cael ei pharatoi gan Arolygydd, efallai y bydd agen cyngor ar:

• yr effaith ar ddosbarthiad yr afon:
• yr effaith ar amcanion Ansawdd Dwr Statudol;
• pa un a yw amod wedi’i eirio’n briodol.

2.2 Lle y bo’n berthnasol, gellir gofyn i bartïon apêl ddarparu rhai o’r manylion canlynol:

• hanes cryno o’r amgylchiadau sy’n gysylltiedig â’r apêl;
• tarddiad y ffynhonnell ddwr a’i gyfansoddiad cemegol a’i nodweddion ffisegol os yw’r gollyngiad o waith trin dwr;
• y cyfaint, unrhyw amrywiad, cyfansoddiad cemegol a nodweddion ffisegol y gollyngiad dwr;
• darlun sgematig o lif y dwr
• cynllun yn dangos lleoliad a manylion gollyngiadau eraill a/neu dyniadau a allai dresmasu ar ollyngiad yr apêl;
• y driniaeth elifiant a’r gwaith trin;
• mesuriad ffisegol y llif dwr a dderbynnir, yn cynnwys Llif Tywydd Sych, neu resymau pam nad yw hyn yn bosibl neu pam na chaiff ei ystyried yn angenrheidiol;
• pa un a fydd dwr ychwanegol ar gael os bydd y llifau dwr yn disgyn o dan lefel benodol;
• y ffyrdd i’w defnyddio ar gyfer monitro’r amodau dadleuol;
• canlyniadau dileu’r amod dadleuol h.y., beth fyddai’r canlyniadau o ran meini prawf y Gymuned Ewropeaidd a meini prawf cenedlaethol;
• mesurau sy’n angenrheidiol i gydymffurfio â’r amod dadleuol neu’r amodau dadleuol;
• pa un a yw’r gwelliannau a geisir gan yr Asiantaeth yn cael eu hariannu gan yr AMP;
• efallai y bydd angen gofyn i’r Asiantaeth ystyried costau a buddiannau eu camau gweithredu mewn unrhyw achos penodol (gweler Adran 39 Deddf yr Amgylchedd 1995).