DEDDF CYNLLUNIO (SYLWEDDAU PERYGLUS) 1990 APELIADAU CANIATÂD SYLWEDDAU PERYGLUS

Canllawiau ar y Weithdrefn Apelio

CYFLWYNIAD

1. Mae’r arweiniad hwn yn cwmpasu’r gweithdrefnau ar gyfer apeliadau o ran caniatadau sylweddau peryglus a roddwyd gan yr awdurdod sylweddau peryglus (ASP). Mae’n egluro’r cefndir deddfwriaethol, yn tynnu’r amrywiol gyhoeddiadau sy’n berthnasol ynghyd ac mae’n nodi rhai o’r materion penodol a all fod yn amodol ar yr apêl. Credir fod y wybodaeth hon yn gywir adeg ei chyhoeddi ac mae’n cyfeirio at weithdrefnau yng Nghymru, ond nid oes iddi statws cyfreithiol. Nodir y gweithdrefnau y dylid eu dilyn yn Rheoliadau Cynllunio (Sylweddau Peryglus) 1992 ac fe’u gwneir o dan ddarpariaethau Adran 21 Deddf Cynllunio (Sylweddau Peryglus) 1990. Hefyd, rhoddir arweiniad yng Nghylchlythyr 20/01, ‘Rheolaethau Cynllunio Sylweddau Peryglus’.

RHESYMAU DROS APELIO

2. Gall y rhai sy’n gwneud cais am ganiatâd sylweddau peryglus apelio o dan Adran 21 Deddf Cynllunio (Sylweddau Peryglus) 1990 ar y seiliau canlynol.

• lle y mae’r awdurdod sylweddau peryglus (ASP) yn gwrthod rhoi caniatâd neu lle y rhoddir caniatâd yn amodol ar amodau;
• lle y mae’r ceisydd wedi gwneud cais i ddileu neu amrywio amod (neu amodau) a oedd ynghlwm wrth ganiatâd sylweddau peryglus a roddwyd yn y gorffennol a bod yr ASP wedi gwrthod y cais neu wedi atodi amodau gwahanol;
• lle y mae’r ceisydd wedi gwneud cais am unrhyw ganiatâd, cytundeb neu gymeradwyaeth sy’n ofynnol gan amod a atodir at ganiatâd sylweddau peryglus blaenorol, ond mae’r ASP wedi gwrthod rhoi caniatâd/cytundeb/cymeradwyaeth;
• lle y mae’r ceisydd wedi gwneud cais i’r ASP o dan Adran 17 Deddf 1990 ar gyfer parhau caniatâd sylweddau peryglus pan fydd newid rhannol ym mherchenogaeth y tir ac mae’r ASP wedi gwrthod y cais; neu
• mae’r ASP wedi methu â chyhoeddi penderfyniad o fewn y cyfnod a ganiateir (hy 8 wythnos o’r dyddiad pan dderbyniwyd y cais, neu unrhyw gyfnod estynedig yn ysgrifenedig rhwng y ceisydd a’r ASP).

CYN GWNEUD APÊL

4. Cynghorir darpar geiswyr i geisio datrys unrhyw drafferthion neu anghytundebau gyda’r ASP cyn apelio. Dylid ystyried apêl fel y dewis olaf.

PWY SY’N PENDERFYNU AR EICH APÊL

5. Yn dilyn yr ymweliad safle, neu ar ôl i wrandawiad neu ymchwiliad ddod i ben, bydd yr Arolygydd yn cyflwyno adroddiad gerbron Cynulliad Cenedlaethol Cymru. Bydd yr adroddiad yn disgrifio’r safle ac yn crynhoi’r dadleuon a’r dystiolaeth a gyflwynwyd. Hefyd, bydd yr Arolygydd yn gwneud argymhelliad o ran pa un a ddylid caniatáu’r apêl ai peidio. Yna, bydd Cynulliad Cenedlaethol Cymru yn ystyried yr holl faterion sy’n ymwneud â’r apêl ac yn gwneud penderfyniad a gaiff ei anfon atoch ac at yr ASP gyda chopi o adroddiad yr Arolygydd.

SUT I APELIO

6. Anfonwch ddogfennau apelio i’r cyfeiriad isod neu cysylltwch â:

Yr Arolygiaeth Gynllunio
Adeiladu’r Goron
Parc Cathays
Caerdydd
CF10 3NQ

Ffôn: 029 2082 5155
Ffacs: 029 2082 5150

7. Caiff manylion y gweithdrefnau ar gyfer apelio eu nodi yn Adran 21 y Ddeddf ac yn Rheoliadau Cynllunio (Sylweddau Peryglus) 1992. Er hwylustod, amlinellir y prif gamau isod.