APELIADAU CANIATÂD SYLWEDDAU PERYGLUS – ADRAN 21 DEDDF CYNLLUNIO (SYLWEDDAU PERYGLUS) 1990

Dewis y weithdrefn

12. Ar ffurflen yr apêl, nodwch pa weithdrefn yr hoffech ei dilyn. Os ydych wedi gwneud cais i’r apêl gael ei hystyried trwy gyfwng cynrychioliadau ysgrifenedig, byddwn yn gofyn i’r ASP a ydynt yn cytuno i hyn neu a fyddai’n well ganddynt gynnal ymchwiliad lleol. Nodir manylion pob un o’r gweithdrefnau isod.

Cynrychioliadau Ysgrifenedig

13. Ymdrinnir ag apeliadau yn ysbryd Rheoliadau Cynllunio Gwlad a Thref (Trosglwyddiadau ac Apeliadau) (Gweithdrefn Cynrychioliadau Ysgrifenedig) (Cymru) 2003, OS 2003 Rhif 390 (W.52).

14. Y dull ysgrifenedig o ymdrin ag apêl yw cyfnewid datganiadau rhyngoch chi a’r ASP, a ddilynir gan ymweliad safle gan yr Arolygydd a fydd yn gwneud argymhelliad i Gynulliad Cenedlaethol Cymru. Fel arfer, dyma’r ffordd gyflymaf, symlaf a rhataf o benderfynu ar apêl.

15. Os ydych wedi gwneud cais am y weithdrefn cynrychioliadau ysgrifenedig, datganiad llawn o’r achos y dymunwch ei chyflwyno ddylai fod seiliau eich apêl. Os dymunwch wneud cynrychioliadau atodol, dylid anfon y rhain at yr Arolygiaeth o fewn 6 wythnos i’r dyddiad dechrau. Bydd yn ofynnol i’r ASP anfon 2 gopi o’u datganiad i’r Arolygiaeth o fewn 6 wythnos o’r dyddiad dechrau. Hefyd, gall unrhyw barti sydd â diddordeb yn yr apêl wneud sylwadau o fewn y cyfnod hwn. Yna, byddwch chi a’r ASP yn cael cyfle i wneud sylwadau ar yr holl gynrychioliadau o fewn 9 wythnos i’r dyddiad dechrau. Yna, bydd yr Arolygydd yn ymweld â’r safle.

16. Mae’n arferol i Arolygydd fynychu’r ymweliad safle gyda chynrychiolydd o’r ddau barti er mwyn cael mynediad i’r safle. Fodd bynnag, ni fydd yr Arolygydd yn caniatáu unrhyw drafodaeth ar deilyngdod yr achos a bydd yn cyfyngu’r drafodaeth i gwestiynau ar nodweddion ffisegol y safle ei hun.

Ymchwiliadau

17. Cynhelir ymchwiliadau yn ysbryd Rheolau Cynllunio Gwlad a Thref (Gweithdrefn Ymchwiliadau) (Cymru) 2003, OS. 2003 Rhif 1266.

18 Gall y naill barti neu’r llall ofyn am ymchwiliad cyhoeddus, neu gall yr Arolygiaeth benderfynu fod angen un. Gall yr Arolygiaeth benderfynu bod ymchwiliad yn angenrheidiol, er enghraifft, lle y caiff tystiolaeth dechnegol arbennig o gymhleth ei chyflwyno; lle y gall fod angen croesholi; lle y cafwyd nifer o gyflwyniadau neu lle y ceir llawer iawn o ddiddordeb ymysg y cyhoedd.

19. Os byddwch wedi gwneud cais am ymchwiliad lleol, dim ond amlinelliad bras o’r achos sydd ei angen yn sail eich apêl. Yna, o fewn 6 wythnos i’r dyddiad dechrau, rhaid i chi a’r ASP gyflwyno datganiad gerbron yr Arolygiaeth yn nodi manylion yr achos yn llawn i’w cyflwyno yn yr ymchwiliad. Yna, cewch chi a’r ASP gyfle i wneud sylwadau ar yr holl gynrychioliadau o fewn 9 wythnos i’r dyddiad dechrau. Hefyd, dylid cyflwyno datganiad ysgrifenedig o dystiolaeth a datganiad o dir cyffredin heb fod yn hwyrach na 4 wythnos cyn yr ymchwiliad. Datganiad ysgrifenedig o dystiolaeth yw datganiad ysgrifenedig o dystiolaeth y mae tyst yn bwriadu ei chyflwyno yn yr ymchwiliad ac, os yw’n hwy na 1,500 gair, dylid cynnwys crynodeb nad yw’n fwy na 10% o hyd y dystiolaeth. Rhestr o’r holl faterion yr ydych chi a’r ASP yn cytuno arnynt yw datganiad o dir cyffredin.

20. Fel arfer, mae ymchwiliad yn dechrau gyda datganiadau agoriadol cryno gan y ddau brif barti. Yna, gall pob parti alw ar dystion i roi tystiolaeth y gellir ei chroesholi gan yr ochr arall. Fel arfer, bydd yr ASP yn cyflwyno ei achos yn gyntaf. Gall partïon eraill sydd â diddordeb hefyd fynychu’r ymchwiliad ac yn ôl disgresiwn yr Arolygydd, cânt fynegi eu barn.

PWYNTIAU ERAILL

Tynnu apeliadau yn ôl

21. Gall ceisydd dynnu’r apêl yn ôl unrhyw bryd cyn belled ag y rhoddir hysbysiad ysgrifenedig i’r Arolygiaeth Gynllunio ac y cânt eu copïo i’r ASP.

Aseswyr

22. Mewn rhai achosion lle cynhelir ymchwiliad, gall eithriad ddigwydd lle y caiff aseswr ei benodi gan yr Arolygiaeth Gynllunio ar ran Cynulliad Cenedlaethol Cymru, i gynghori’r Arolygydd ar faterion technegol arbenigol iawn. Bydd yr aseswr yn ysgrifennu adroddiad ac yn ei anfon at yr Arolygydd, y bydd ei gynnwys yn cael ei wneud yn gyhoeddus pan gaiff penderfyniad ei wneud.

23. Lle y penodir aseswr, bydd pawb sydd â hawl i fod yn bresennol yn yr ymchwiliad yn cael eu hysbysu o enw’r aseswr a’r materion y bydd ef neu hi yn cynghori’r Arolygydd arnynt.

Costau

24. Fel arfer, bydd yn rhaid i chi a’r ASP dalu eich costau eich hunain ar gyfer yr apêl. Fodd bynnag, os mai mewn ymchwiliad y bydd penderfyniad ar yr apêl yn cael ei wneud, gallwch wneud cais i’r ASP orfod talu eich holl gostau neu ran o’ch costau.

25. Fel arfer, trafodir ceisiadau am gostau tua diwedd gweithrediadau’r ymchwiliad a dim ond os bydd y parti sy’n gwneud cais am gostau yn gallu dangos bod yr ochr arall wedi ymddwyn yn afresymol ac wedi peri iddynt orfod gwario’n ddiangen y gellid gwneud hyn.

Cwynion am y penderfyniad

26. Mae penderfyniad Cynulliad Cenedlaethol Cymru yn derfynol. Erbyn hyn, ni all Cynulliad Cenedlaethol Cymru ystyried cynrychioliadau pellach neu wneud unrhyw sylwadau pellach ar deilyngdod yr achos nac ar unrhyw beth arall sy’n ymwneud â hi.

27. Dim ond yn yr Uchel Lys y gellir herio’r penderfyniad. Rhaid gwneud cais i’r Uchel Lys o fewn 6 wythnos i benderfyniad Cynulliad Cenedlaethol Cymru. Os caiff yr apêl ei ddileu ar ôl gweithrediadau’r Uchel Lys, hysbysir y prif bartïon a bydd gofyn iddynt ddarparu unrhyw gynrychioliadau pellach o fewn 28 diwrnod. Yna, gall Cynulliad Cenedlaethol Cymru ofyn i ymchwiliad gael ei gynnal neu ei ailagor a bydd penderfyniad newydd yn cael ei wneud ar yr apêl.

Cwynion am yr Arolygiaeth Gynllunio

28. Bydd y llythyrau sy’n cydnabod bod yr apêl wedi’i derbyn yn nodi enw’r Swyddog Achos sy’n ymdrin â’r apêl. Os bydd gennych unrhyw ymholiadau neu gwynion am y modd yr ymdriniwyd â’ch apêl, dylech gysylltu â’ch Swyddog Achos yn gyntaf. Os nad yw hyn yn foddhaol, gellir cysylltu â’r Swyddog Cwynion yn y cyfeiriad canlynol:

Y Swyddog Cwynion
Yr Arolygiaeth Gynllunio
Adeiladau’r Goron
Parc Cathays
Caerdydd
CF10 3NQ

Ffôn: 029 2082 3889
Ffacs: 029 2082 5150