Gwneud eich Apêl am Dystysgrif Datblygiad Cyfreithlon (Arweiniad)

Y weithdrefn ar gyfer gwrandawiad

Er mai drwy ymchwiliad neu gynrychioliadau ysgrifenedig y pennir apeliadau am dystysgrif datblygiad cyfreithlon fel arfer, gall gwrandawiadau fod yn briodol weithiau. Mae gwrandawiadau yn llai ffurfiol nag ymchwiliadau ac fel arfer, maent yn cynnwys trafodaeth agored o dan arweiniad yr Arolygydd. Galwch chi a’r ACLl ofyn am wrandawiad, ond nid oes gennych hawl i gael un.

Fel arfer, mae’r weithdrefn ar gyfer gwrandawiad yn gynt ac yn rhatach nag ymchwiliad. Byddwn yn cytuno i wrandawiad pryd bynnag y bydd yn briodol. Nid yw gwrandawiadau yn addas ar gyfer apeliadau lle y mae’n rhaid croesholi tystion nac ar gyfer apeliadau sy’n gymhleth neu’n ddadleuol, neu sydd wedi achosi llawer o ddiddordeb lleol. Am y rheswm hwn, nid ydynt yn aml yn briodol ar gyfer apeliadau am dystysgrif datblygiad cyfreithlon, lle y ceir anghydfod yn aml ynghylch y ffeithiau.

Rheolau Cynllunio Gwlad a Thref (Gorfodi) (Gweithdrefn Gwrandawiadau) (Cymru) 2003 yw’r rheoliadau ar gyfer ymdrin â gwrandawiadau. Yn yr un modd â’r gweithdrefnau eraill, mae angen i ni dderbyn eich sylwadau o fewn terfynau amser pwysig. Fel arfer, ni fydd yr Arolygydd yn ystyried unrhyw sylwadau a dderbynnir ar ôl i’r terfyn amser ddod i ben, a byddwn yn eu dychwelyd atoch.

Eglurir amserlen a chamau’r apêl sy’n arwain at y gwrandawiad yn adran 3.

Yn ôl y rheolau, dylai’r dyddiad ar gyfer y gwrandawiad fod o fewn 12 wythnos i’r dyddiad dechrau. Byddwn yn trefnu amser a dyddiad cyfleus ar gyfer y gwrandawiad. Os na allwch dderbyn y dyddiad cyntaf a gynigir gennym, byddwn yn pennu dyddiad arall a disgwylir i chi fod yn bresennol. Byddwn yn rhoi o leiaf pedair wythnos o rybudd i chi a’r ACLl ynglyn â dyddiad y gwrandawiad.

Gallwn ofyn i’r ACLl hysbysebu’r gwrandawiad mewn papur newydd lleol o leiaf pythefnos cyn dyddiad y gwrandawiad, a hysbysu’r bobl â diddordeb amdano hefyd.

Yn ystod y gwrandawiad, bydd yr Arolygydd yn arwain trafodaeth anffurfiol ar y prif faterion. Gall pobl fynd â chynrychiolydd cyfreithiol gyda hwy i’r gwrandawiad ond yn aml, nid yw’n angenrheidiol.

Ymweld â’r safle mewn perthynas â’r gwrandawiad

Fel arfer, bydd yr Arolygydd yn penderfynu a ddylid ymweld â’r safle neu barhau â’r drafodaeth ar y safle. Bydd ef neu hi yn eich hysbysu am hyn yn y gwrandawiad.

Yn ystod yr ymweliad â’r safle, gallwch ddangos unrhyw nodweddion ffisegol ar y safle a’r ardal o’i amgylch. Yn wahanol i ymchwiliad, gallwch drafod eich apêl os bydd yr Arolygydd yn cytuno i hynny.

Pobl ag anableddau

Rydym am gynnal pob gwrandawiad mewn adeiladau â chyfleusterau priodol ar gyfer pobl ag anableddau. Fel arfer, mae’r ACLl yn dewis ac yn darparu’r lleoliad a byddwn wedi gofyn iddynt dalu sylw arbennig i anghenion pobl ag anableddau. Os byddwch chi, neu unrhyw un rydych yn ei adnabod, am fynd i’r gwrandawiad a bod gennych anghenion penodol, cysylltwch â’r ACLl i gadarnhau y gallant wneud trefniadau priodol.