Yr Arolygiaeth Gynllunio - Cymru Cyhoeddiad 9
Pwyso a Mesur Fframweithiau Datblygu Lleol 
Bellach, mae gan ein Harolygwyr ddwy flynedd lawn o brofiad o archwilio Dogfennau Cynlluniau Datblygu. Er bod her sylweddol yn parhau i wynebu pawb sy'n gysylltiedig â'r system Fframwaith Datblygu Lleol, mae llawer wedi'i gyflawni eisoes yn erbyn llwybr dysgu serth iawn sy'n galw am ffyrdd newydd o feddwl a ffyrdd newydd o weithio.
Faint o gynnydd yr ydym wedi ei wneud? Ar ddiwedd y flwyddyn ariannol hon:
- Roeddem wedi cael 152 o Ddogfennau Cynlluniau Datblygu ac wedi cyhoeddi 67 adroddiad terfynol.
- Cyflwynwyd 55 Dogfen Cynllun Datblygu i gyd yn 07/08 sy'n llai na'r 77 Dogfen Cynllun Datblygu a gyflwynwyd yn 06/07. Fodd bynnag, ceir tystiolaeth gynyddol i ddangos bod ansawdd y Dogfennau Cynlluniau Datblygu a gyflwynir yn gwella. Gwelwyd bod 87% o'r Dogfennau Cynlluniau Datblygu yn 07/08 yn gadarn (47 allan o 54) o gymharu â 54% yn 06/07 (7 allan o 13). Yn fwy calonogol fyth, gwelwyd bod pob Dogfen Cynllun Datblygu a gyflwynwyd hyd yn hyn yn 2008 yn gadarn.
- O ran hyd y cyfnod archwilio, mae traean o'r archwiliadau o Ddogfennau Cynlluniau Datblygu wedi'u cwblhau mewn 9 mis neu lai, yn erbyn amserlen ddangosol o 12 mis.
- Mae 376 o adroddiadau o Ddatganiadau Cynnwys Cymunedau wedi'u cyhoeddi. Mae PINS yn amcangyfrif bod tua 96% o awdurdodau cynllunio lleol wedi mabwysiadu Datganiad Cynnwys Cymunedau erbyn hyn.
Mae'r Arolygiaeth wedi ceisio rhannu profiad ymarferol drwy gyhoeddi "Lesson Learnt Examining Development Plan Documents", a bydd yn diwygio'r cyhoeddiad hwn yn fuan. Gallwn hefyd edrych ar fentrau eraill i gynorthwyo'r broses gyflwyno yn 08/09 a gaiff eu cynnwys yng nghyhoeddiad Datganiad Cynllunio Polisi 12 sydd wedi'i ddiwygio a'r rheoliadau diwygio atodol sy'n symleiddio'r broses; mwy o gyllid o bosibl ar gyfer Awdurdodau Cynllunio Lleol drwy'r Grant Cyflwyno Tai a Chynllunio ac arweiniad a phwyslais cliriach ar gyflwyno Dogfennau Cynllunio Datblygu sy'n 'flaenoriaeth'.
Rydym wedi ymbaratoi i gynnal tua 170 o archwiliadau o Ddogfennau Cynlluniau Datblygu bob blwyddyn. Os bydd mwy na'r nifer hyn o Ddogfennau Cynlluniau Datblygu yn cael eu cyflwyno i'w harchwilio mewn blwyddyn, yr her fydd sicrhau adnoddau i ateb y galw. Mae'r mater hwn yn cael ei ystyried ar hyn o bryd gan yr Arolygiaeth, yr Adran Cymunedau a Llywodraeth Leol a Swyddfeydd y Llywodraeth.
