Beth rydym yn ei wneud

Ein prif swyddogaeth yw prosesu apeliadau cynllunio a gorfodi a chynnal ymchwiliadau i gynlluniau datblygu lleol. Rydym hefyd yn delio ag amrywiaeth eang o waith achos arall sy'n gysylltiedig â chynllunio gan gynnwys a peliadau caniatâd adeiladau rhestredig, apeliadau hysbysebu, a chyflwyno adroddiadau ar geisiadau cynllunio y mae angen i Lywodraeth Cynulliad Cymru benderfynu arnynt, neu, Swyddfa'r Dirprwy Brif Weinidog yn Lloegr, gorchmynion prynu gorfodol amrywiol, achosion hawliau tramwy ac achosion sy'n codi o Ddeddfau Diogelu'r Amgylchedd a Dwr a'r Ddeddf Trafnidiaeth a Gwaith. Yn ogystal rydym yn prosesu ceisiadau ar gyfer dyfarnu costau a allai godi o unrhyw un o'r rhain.

Disgrifir y gweithdrefnau ar gyfer yr amrywiol fathau o waith achos yn y taflenni unigol yr ydym yn eu cynhyrchu. Fodd bynnag, yr egwyddor sylfaenol yw y dylai pob parti gael cyfle teg i gyflwyno eu barn boed yn ysgrifenedig, neu mewn gwrandawiad cyhoeddus. Lle mae safle penodol yn gysylltiedig, fel arfer bydd yr Arolygydd a benodwyd i ddelio â'r achos, neu swyddog arall o'r Asiantaeth (yn dibynnu ar y math o achos) yn ymweld â'r safle. Bydd yr holl dystiolaeth a gyflwynir yn cael ei ystyried cyn y caiff penderfyniad ei wneud, a fydd hefyd yn ystyried polisi cyhoeddedig y llywodraeth. Yn y mwyafrif o achosion, gwneir y penderfyniad gan yr Arolygydd; mewn rhai eraill, bydd yr Arolygydd yn paratoi adroddiad ac yn gwneud argymhelliad i'r Cynulliad Cenedlaethol Cymru neu i'r Ysgrifennydd Gwladol.